وینزویلا نے امریکی سفارت کاروں کو 48 گھنٹوں میں ملک سے نکل جانے کا حکم دیا ہے

کراکس: وینزویلا نے امریکا کی جانب سے اقتصادی پابندیاں عائد کرنے کے ردعمل میں امریکی سفارت کاروں کو 48 گھنٹوں میں ملک سے نکل جانے کا حکم دیا ہے۔ خبررساں ادارے کے مطابق صدر نکولاس مادورو نے دو اعلٰی ترین امریکی سفارت کاروں ٹوڈروبنسن اور برائن ناانیوس کو  48 گھنٹوں کے اندر ملک سے نکل جانے کا حکم جاری کردیا ہے۔ دونوں سفارت کاروں پر وینزویلا کے اندرونی معاملات میں دخل اندازی اور منتخب حکومت کے خلاف سازش کرنے کے الزامات تھے۔

دوسری بار صدارت کا عہدہ سنبھالنے والے نکولاس مادورو نے امریکی سفارت کاروں کو ملک بدری کا حکم امریکا کی جانب سے وینزویلا پر عائد کی گئی اقتصادی پابندیوں کے بعد دیا۔ امریکی صدر ڈونلڈ ٹرمپ نے وینزویلا میں ہونے والے انتخابات کو ڈھونگ قرار دیتے ہوئے تیل کی ترسیلات سے متعلق معاہدوں کو معطل کردیا تھا۔

واضح رہے کہ امریکا اور یورپی ممالک سمیت دیگر عالمی قوتوں نے وینزویلا میں ہونے والے متنازعہ انتخابات کو جعلی اور بوگس قرار دیتے ہوئے مسترد کردیا تھا جب کہ ان انتخابات کا وینزویلا کی اپوزیشن جماعتوں نے بھی بائیکاٹ کیا تھا، ان انتخابات میں صدر نکولاس نے 68 فیصد ووٹ حاصل کر کے کامیابی حاصل کی تھی جب کے مخالف امیدوار کو 21 فیصد ووٹ ملےتھے۔