غزہ کے خلاف جنگ کا 230 واں دن؛ شہدا کی تعداد 35 ہزار 709 ہوگئی

غزہ جنگ کے دو سو تیسویں دن بھی غزہ، جبالیہ اور رفح پر حملوں کے تسلسل کے ساتھ صیہونی حکومت کے جرائم کا سلسلہ جاری ہے۔ اس جنگ میں شہیدوں کی تعداد آج 35 ہزار 709 ہوگی ہے۔

 صیہونی حکومت کے جنگی طیاروں نے غزہ کی پٹی کے خلاف جنگ کے 230ویں روز مختلف علاقوں پر بمباری کر کے درجنوں افراد کو شہید اور زخمی کر دیا۔

گزشتہ 24 گھنٹوں کے دوران قابض حکومت نے فلسطینی خاندانوں کے خلاف 6 قتل عام کیے جس کے نتیجے میں 62 افراد شہید اور 138 زخمی ہوئے اور اس طرح 7 اکتوبر سے اب تک شہداء کی تعداد 35 ہزار 709 اور زخمیوں کی تعداد 79,990 افراد تک بھی پہنچ گئے۔

اسرائیلی جنگی طیاروں نے گزشتہ رات غزہ شہر پر تین بار بمباری کی جس کے دوران 10 بچوں سمیت 16 فلسطینی شہید ہوگئے۔

فاطمہ الزہرا کی ایک مسجد اور مدرسہ پر بمباری میں کم از کم 10 افراد شہید ہوئے جہاں غزہ کے وسط میں واقع الدرج محلے سے بے گھر ہونے والے متعدد افراد نے پناہ لی تھی۔

اس کے علاوہ غزہ شہر کے جنوب میں واقع تل الحوا محلے کے ایک اپارٹمنٹ پر حملے میں ایک فلسطینی شہید اور متعدد زخمی ہوئے۔

جبالیہ میں صیہونی حملوں کا سلسلہ جاری ہے اور مسلسل بارہویں روز بھی صیہونی فوجیوں نے جبالیہ کیمپ پر حملہ کیا اور اس کیمپ کے آس پاس کے علاقوں کا محاصرہ کیا۔