بھارت کی متعدد ریاستوں میں بارش کی باعث تباہی

اترپردیش اور بہار میں گذشتہ تین دنوں سے ہورہی بارش نے معمولات زندگی کو مفلو ج کردیا ہے۔ موسلادھاربارش کی وجہ سے تعلیمی ادارے بند ہیں اورلوگ گھروں میں رہنے پر مجبور ہوئے ہیں۔
شدید بارش کی وجہ سے گذشتہ 48 گھنٹوں میں تقریبا 54 افراد ہلاک اور درجنوں افراد زخمی ہوئے۔ سڑکوں پر دو سے تین فٹ پانی جمع ہوگیا ہے۔ بہت سے علاقوں میں گاڑیوں کی آمد رفت مکمل بند ہے۔ بجلی کی فراہمی ، ٹیلیفون اور انٹرنیٹ سروس میں خلل پڑا ہے۔ پٹنہ سٹی کے علاقے میں بارش کا پانی نالندہ میڈیکل کالج اسپتال (این ایم سی ایچ ) میں داخل ہوگیا ہے۔ مریضوں کو کسی اور جگہ بھیجا جارہا ہے۔
پٹنہ کے ضلع مجسٹریٹ کمار روی نے شدید بارش کے باعث ضلع بھرکے تمام سرکاری اور نجی تعلیمی اداروں کو 30 ستمبر تک بند رکھنے کا حکم دیا ہے۔
وزیر اعلی یوگی آدتیہ ناتھ نے مقامی انتظامیہ کو بارش متأثرین کی ہر ممکن مدد کو یقینی بنانے کی ہدایت دی ہے۔