یمن کا فلسطین کی حمایت اسرائیل پر اقتصادی حملہ

تحریر:ایس اے شہزاد
بشکریہ:شفقنا اردو

12 جنوری سے یمن پر برطانوی اور امریکی فضائی حملے، آسٹریلیا، کینیڈا اور ہالینڈ سمیت دیگر ممالک کی حمایت سے شروع کیے گئے، جوایک بار پھر یہ ظاہر کرتے ہیں کہ کس طرح زیادہ تر مغربی ممالک اپنے پیسے اور منافع کو انسانی جان سے کہیں زیادہ اہمیت دیتے ہیں۔

غزہ پر اسرائیل کی تباہ کن جنگ، تاریخ کی پہلی براہ راست نسل کشی، 7 اکتوبر سے اب تک 27,000 سے زیادہ فلسطینی جانیں لے چکی ہے، جن میں سے بڑی تعداد میں معصوم بچے ہیں۔ مسلسل اور بظاہر اندھا دھند اسرائیلی بمباری اس دوران پٹی پر تقریباً مکمل محاصرے نے زندہ بچ جانے والوں کو فاقہ کشی کے دہانے پر پہنچا دیا اور ڈاکٹروں کو جراثیم سے پاک کئے بغیر آلات کا استعمال کرتے ہوئے ، اوربے ہوشی کی دوا کے بغیر آپریشن  کرنے پر مجبور کر دیا۔ اس ناقابل تردید انسانی تباہی کے پیش نظر مغربی حکومتوں نے کوئی بامعنی اقدام نہیں کیا۔ درحقیقت، امریکی صدر جو بائیڈن اور برطانیہ کے وزیرِ اعظم رشی سنک دونوں نے بارہا یہ واضح کیا کہ وہ غزہ پر اسرائیل کے حملے اور فلسطینیوں کے لیے جو بھی انسانی قیمت ادا کرنا پڑے وہ  "حماس” کے خاتمے کی کوششوں کی غیر مشروط حمایت جاری رکھیں گے۔

آخر کار، یہ دسیوں ہزار عام شہریوں کا قتل اور انہیں  معذور بنائے جانے کا عمل نہیں تھا ، بلکہ یمن کے حوثی جنگجوؤں کی جانب سے تزویراتی لحاظ سے اہم آبنائے باب المندب سے گزرنے والے تجارتی جہازوں پر متعدد غیر مہلک حملے تھے جنہوں نے مغربی ممالک کو حرکت میں لایا۔ واضح طور پر، حملوں کی وجہ سے جہاز رانی کے اخراجات میں تیزی سے اضافے کی وجہ سے جو ڈالر اور پاؤنڈ ضائع ہوئے وہ مشرق وسطیٰ میں انسانی  خون کی ندیوں کی نسبت "آزاد دنیا” کے رہنماؤں کے لیے زیادہ قیمتی ثابت ہوئے۔

آبنائے باب المندب، جو بحیرہ احمر اور نہر سویز تک جاتا ہے، بین الاقوامی تجارت کے لیے انتہائی اہم آبی گزرگاہوں میں سے ایک ہے۔ ایک اندازے کے مطابق تمام عالمی تجارت کا 12 فیصد، بشمول خلیج سے پیٹرولیم اور قدرتی گیس کی زیادہ تر برآمدات آبنائے سے گزرتی ہیں، جو کہ سالانہ $1 ٹریلین ڈالر کی تجارت بنتی ہے۔

بحیرہ روم کے مشرق میں واقع اسرائیل اپنے زیادہ تر سامان کے لیے اس تجارتی راستے پر انحصار کرتا ہے۔ حوثیوں کا کہنا ہے کہ یہی انحصار تھا جس نے انہیں باب المندب سے گزرکر اسرائیل جانے والے اور اسرائیل کی ملکیت والے جہازوں کو روکنے کی راہ سجھائی ۔ ان کا کہنا تھا کہ اگر اسرائیل غزہ میں جنگ بندی پر رضامند ہو جاتا ہے یا کم از کم انسانی بنیادوں پر کافی امداد کی اجازت دیتا ہے تو وہ حملے بند کر دیں گے۔

بحیرہ احمر کی جہاز رانی پر حوثیوں کے حملوں میں ، اب تک نشانہ بنائے گئے جہازوں کے سویلین عملے کا کوئی جانی نقصان نہیں ہوا ہے، لیکن اسرائیل اور اس کے حامیوں کو خاصا اقتصادی نقصان پہنچا ہے۔ ایک اندازے کے مطابق حوثیوں کے حملوں کے آغاز کے بعد سے اسرائیل کی مرکزی بندرگاہ ایلات میں سرگرمیوں میں 85 فیصد کمی دیکھی گئی ہے۔

ان حملوں کی وجہ سے کچھ بڑی شپنگ کمپنیوں بشمول برٹش پیٹرولیم اور شیل نے بحیرہ احمر میں اپنا کام مکمل طور پر معطل کر دیا۔ معطلی کے باعث سامان کی ترسیل میں شدید تاخیر کے ساتھ ساتھ شپنگ کے اخراجات میں غیر معمولی اضافہ ہوا۔ تازہ ترین دستیاب اعداد و شمار کے مطابق، عام شپنگ کی قیمتیں نومبر میں اس اہم شپنگ روٹ میں رکاوٹ کے آغاز سے پہلے کے مقابلے آج 329 فیصد زیادہ مہنگی ہیں۔

حملوں نے یمن اور پورے خطے میں حوثیوں کی مقبولیت میں بھی اضافہ کیا، اور اس حریت پسند مسلح گروپ کو مغربی سامراجی جارحیت کے خلاف ایک باعزت اور قابل ذکر مزاحمتی قوت کے طور پر دوبارہ برانڈ کرنے کا باعث بنا۔

مغربی ممالک یقیناً اس سب سے بچ سکتے تھے اور اسرائیل کو غزہ میں نسل کشی روکنے اور فلسطینی علاقوں پر اپنا قبضہ ختم کرنے پر مجبور کر کے بہت سے فلسطینیوں کی جانیں بچا سکتے تھے۔ اسرائیل کو فلسطینیوں کا قتل بند کرنے کا کہہ کر پریشان کرنے کے بجائے، مغرب کے رہنماؤں نے دنیا کے غریب ترین ممالک میں سے ایک کے خلاف ایک اور بمباری کی مہم شروع کرنے کا فیصلہ کیا۔

اس اقدام سے انہوں نے نہ صرف یہ ظاہر کیا کہ انہیں اجتماعی قتل کی کوئی پرواہ نہیں ہے جب یہ قتل ان کے اتحادیوں میں سے کسی کی طرف سے کیا جاتا ہے، بلکہ یہ بھی کہ وہ مغربی تجارتی کمپنیوں کے منافع کے مارجن کو مشرق وسطیٰ کی زندگیوں  سے کہیں زیادہ اہمیت دیتے ہیں۔

بلاشبہ، اس میں سے کوئی بھی کسی بھی طرح سے حیران کن یا غیر معمولی نہیں ہے۔

آخر کار سرمایہ داری میں انسانی زندگی چاہے وہ فلسطینی ہو، یمنی ہو، امریکی ہو ، دیگر اجناس کی طرح ایک جنس ہے جو ضائع بھی ہو سکتی ہے۔ مغربی حکومتیں ایک بے رحم معاشی نظام میں کام کرتی ہیں جہاں خوفناک  تصورات جیسے "ویلیو آف سٹیسٹیکل لائف (VSL)” کو معمول بنایا جاتا ہے۔ VSL کا مقصد رقم کی اس مقدار  کا حساب لگانا ہے جو ایک معاشرہ ایک انسانی جان بچانے کے لیے حقیقی طور پر ادا کرنے کے لیے خرچ کی جاتی ہے ۔ یہ انسانوں کو ایک مالیاتی قیمت تفویض کرتا ہے جو حکومتی پالیسی کے لیے بنیاد بنتاہے۔ اگر کسی خاص جان بچانے والے اقدام کو VSLاس کی بچت  سے زیادہ مہنگا سمجھا جاتا ہے ، تو پالیسی لاگو نہیں ہوتی ہے۔ مثال کے طور پر، 1975 میں، یو ایس ڈپارٹمنٹ آف ٹرانسپورٹیشن نے تمام ٹرکوں کے عقب میں حفاظتی سلاخوں کی تنصیب کے ضابطے کو مسترد کر دیا، جس سے تصادم میں ہلاکتوں کی تعداد کم ہو جاتی، کیونکہ اس کے خیال میں اس پالیسی کو لاگو کرنے کی لاگت VSL سے زیادہ ہو جائے گی ۔

اگر امریکی حکومت ریاست ہائے متحدہ امریکہ میں اپنی زندگیاں گزارنے والے امریکی شہریوں کو سرمایہ داری کی قربان گاہ پر قابل انسداد  موت مرنے کی اجازت دینے کے لیے تیار ہے، تو یہ حیرت کی بات نہیں ہے کہ اس نے تجارتی جہازوں کو مغرب مخالف مزاحمت سے بچانے کے لیےبحیرہ احمر میں ایک پوری ٹاسک فورس کو اکٹھا کیا۔

مزید برآں، جب کہ مغربی حکومتوں کے لیےعا م حالات میں بھی  انسانی جانوں، اور خاص طور پر غیر مغربی زندگیوں کو بچانے کے لیے عسکری یا دوسری صورت میں بامعنی اقدام کرنا بہت کم عمل  میں آتا ہے – ، لیکن معاشی فائدے کے لیے جنگ کرنا ان کے معمول کا حصہ ہے۔ مثال کے طور پر 2003 کی عراق جنگ کو بڑی حد تک "بڑے تیل” کے لیے لڑی جانے والی جنگ کے طور پر قبول کیا جاتا ہے۔ جنگ نے دس لاکھ سے زیادہ عراقیوں کو ہلاک کیا، اور بے مثال عدم استحکام پیدا کیا جس نے مزید تنازعات اور مصائب کو جنم دیا، لیکن بی پی جیسی کمپنیوں کو کئی اربوں کا منافع فراہم کیا۔

پچھلے مہینے کے آخر میں، امریکہ کے ساتھ مل کر یمن پر حملہ کرنے کے اپنے فیصلے کی وضاحت کرتے ہوئے، برطانیہ کے سنک نے دعویٰ کیا کہ "ہم ان حملوں کی حمایت میں کھڑے  نہیں ہو سکتے اور ان حملوں کو بغیر کسی چیلنج کے جاری رہنے کی  اجازت بھی نہیں دے سکتے۔ بے عملی بھی ایک انتخاب ہے۔”

اس جملے میں منافقت حیران کن ہے۔

برطانوی وزیر اعظم نے صرف اس بات کو اس وقت تسلیم کیا کہ بے عملی "بھی ایک انتخاب” ہے جب حوثی جنگجوؤں نے فیصلہ کیا کہ وہ فسطینیوں پر اسرائیلی حملے رکوانے کے لیے کارروائی کریں گے، اور سرمایہ دار مغرب کووہاں  ماریں گے جہاں اسے تکلیف پہنچتی ہے ۔

وہ چار مہینوں سے بے عملی پر بہت مطمئن ہے کیونکہ اسرائیل نے غزہ میں 20 لاکھ سے زیادہ انسانوں کو مکمل استثنیٰ کے ساتھ ہلاک اور  زخمی کیا ، یا بے گھرکیا اور بھوکا مارا ہے۔ درحقیقت، وہ فلسطینیوں کی جان بچانے کے لیے چند خالی بیانات اور تھوڑی سی امداد بھیجنے کے علاوہ کوئی کارروائی نہ کرنے پر اب بھی کافی مطمئن ہے۔

بحیرہ احمر کی جہاز رانی پر حوثیوں کے حملے نسل کشی کو ختم کرنے یا غزہ میں دم گھٹنے والے فلسطینیوں کے لیے لائف لائن فراہم کرنے میں کامیاب نہیں ہو سکے۔ اس کے باوجود، وہ مغرب کی ان ترجیحات کو بے نقاب کرنے میں کامیاب ہو گئے، جو زندگی کی قدروقیمت ، اور خاص طور پر فلسطینیوں کی قدروقیمت  کو سمجھنے اور اس کا احترام کرنے میں اس کی بظاہر فطری نااہلی ہے۔