سکھر میں دو تکفیری دہشتگرد ہلاک

پاکستان میں صوبہ سندھ کے شہر سکھر میں محکمہ انسداد دہشت گردی اور حساس ادارے نے مشترکا کارروائی کے دوران 2 دہشت گردوں کو زخمی حالت میں گرفتار کیا گیا، تاہم دونوں دوران علاج اسپتال میں دم توڑ گئے۔

ترجمان محکمہ انسداد دہشت گردی سندھ ( سی ٹی ڈی) کی جانب سے جاری بیان کے مطابق وفاقی حساس ادارے اور سی ٹی ڈی سندھ نے سکھر میں تھانہ پٹنی کے حدود میں مشترکہ کارروائی کی۔

اس دوران قانون نافذ کرنے والے اداروں کے اہل کاروں کو دیکھتے ہی دہشت گردوں نے جدید ہتھیاروں سے فائرنگ شروع کردی۔ فائرنگ کے تبادلے میں 2دہشت گردوں کو زخمی حالت میں گرفتار کیا گیا۔

ترجمان سی ٹی ڈی کا مزید کہنا تھا کہ چھاپہ کالعدم ٹی ٹی پی کے دہشت گردوں کی اطلاع پر مارا گیا۔ حساس ادارے اور سی ٹی ڈی اہلکاروں نے پورے علاقے کو گھیرے میں لے لیا۔ دونوں دہشت گردوں کو طبی امداد کیلئے اسپتال منتقل کیا گیا، جہاں وہ دوران علاج دم توڑ گئے۔

دہشت گردوں کے ٹھکانے کو گھیرے میں لے کر علاقے کے داخلی اور خارجی راستوں کو مکمل سیل کیا گیا ہے، جب کہ ٹھکانے میں بارودی مواد اور جدید اسلحہ برآمد کیا گیا ہے.