جوبائیڈن نے یمن کے خلاف سعودی حمایت ختم کردی

امریکی صدر جوبائیڈن کی وزارت جنگ نے ایک بار پھر دعوا کیا ہے کہ یمن کے خلاف سعودی عرب کا ساتھ نہیں دیا جائے گا۔

چھ برسوں تک یمن کے نہتے اور بے گناہ معصوم بچوں اور عورتوں کا قتل عام کرنے کے بعد امریکہ نے سعودی عرب کے ساتھ انٹیلی جنس تعاون ختم کرنے کا فیصلہ کیا ہے۔

اس سلسلے میں امریکی وزارت جنگ پینٹاگون نے دعوی کیا ہے کہ واشنگٹن نے یمن کی جنگ میں ریاض کو انٹیلی جنس کے شعبے میں دی جانے والی مدد و حمایت بند کر دی ہے۔

امریکی وزارت جنگ پینٹاگون کے ترجمان نے کہا کہ ہم نے یمن کی جنگ کے تعلق سے اگرچہ ریاض کے ساتھ تعاون ختم کئے جانے کا فیصلہ کیا ہے تاہم اس کے باوجود آل سعود بدستور امریکہ کے حلقہ بگوش شمار ہوتے رہيں گے۔

سعودی اور اماراتی اتحاد امریکی معاونت اور حمایت کے زیر سایہ چھے برس سے یمن کے عوام کو براہ راست اپنی جارحیت کا نشانہ بنا رہا ہے، اس دوران یمن کی بنیادی تنصیبات کو فضائی بمباری اور میزائیلی حملوں کے ذریعے ملبے کے ڈھیر میں تبدیل کر دیا گیا ہے جبکہ کم از کم سترہ ہزار یمنی شہید، دسیوں ہزار زخمی اور لاکھوں بے گھر ہو چکے ہیں۔