اسلامی وحدت نے شیعہ اور اہل سنت کو ایک دوسرے کے نزدیک کردیا ہے

ھفتہ وحدت کی مناسبت سے چونتیسویں سالانہ بین الاقومی وحدت اسلامی کانفرنس کی افتتاحی تقریب سے خطاب کرتے ہوئے حزب اللہ لبنان کے سیکرٹری جنرل شیخ نعیم قاسم نے کہا ہے کہ توہین رسالت پر فرانسیسی صدر اور حکومت فرانس کی جانب سے دفاع کیا جانا مغربی اقدار کے سطحی ہونے اور زمانہ جاہلیت کی جانب انکی بازگشت کی واضح مثال ہے۔
 
تقریب خبر رساں ایجنسی کے مطابق اس سال چونتیسویں سالانہ بین الاقوامی وحدت اسلامی کانفرنس کا کورونای جیسی موذی بیماری اور وبا کی وجہ سے آنلائن اہتمام کیا گیا ہے جس کا آج صبح آٹھ بجے iuc.taqrib.ir/live سمیت سوشل میڈیا پر باقاعدہ آغاز ہوچکا ہے۔

حزب اللہ لبنان کے سیکرٹری جنرل شیخ نعیم قاسم نے اس موقع پر گفتگو کرتے ہوئے کہا کہ اسلامی وحدت کی اہمیت کسی سے پوشیدہ نہیں ہے۔ ہمارے امام، امام خمینی رھ نے مسلمانوں کو اسلامی وحدت کی جانب مدعو کیا اور انکی رہبری اور ولایت کی برکت سے یہ موضوع ایک عالمی تحریک میں تبدیل ہوچکا ہے۔ امام خامنہ ای بھی اسی راہ وحدت کو آگے بڑھا رہے ہیں اور انکے زیر سایہ  اور انکی ہدایت کی روشنی میں اسکے عظیم اہداف حاصل ہوں گے جس کا ہم اور آپ بخوبی مشاہدہ کریں گے۔
 
انہوں نے کہا کہ اسلامی وحدت نے شیعہ اور اہل سنت کو ایک دوسرے کے نزدیک کردیا ہے جس کی وجہ سے فلسطین کے کاز کو تقویت پہنچی ہے جس نے اسرائیل کے خلاف استقامتی محاز کو شکیل دیا ہے۔
 
شیخ نعیم قاسم نے کہا کہ اسلامی اتحاد نے تکفیریوں کو رسو کردیا ہے اور اسلام کے حقیقی پرچم کو سربلند کیا ہے اور یہ ثابت کردکھایا ہے کہ اسلام برادر، نصرت اور کامیابی کا مذہب ہے۔
 
حزب اللہ لبنان کے سیکرٹری جنرل نے کورونا کی منحوس وبا کا ذکر کرتے ہوئے کہا کہ ہمیں عالمی سطح پر اس منحوس وبا کا سامنا ہے ۔ اس وبا نے پوری عالم انسانیت کو اپنی لپیٹ میں لے لیا ہے۔ کورونا ایک بلا اور ہمارے لئے ایک امتحان ہے۔ امیرالمومنین علی بن ابی طالب علیہ السلام نے فرمایا ہے کہ بلا ظالم کے لئے تنبیہ، مومن کے لئے امتحان، انبیاء کے  درجات میں اضافے کا سبب اور اولیا کے لئے کرامت کا باعث ہے۔

توہین رسالت ص کے سلسلے میں گفتگو کرتے ہوئے انہوں نے کہا کہ مسلمانوں کو اپنے پیارے نبی ص سے تعلق جوڑے رکھنے کا حق حاصل ہے،۔ مغربی ممالک جو آزادی اظہار کے دعوے دار ہیں انہیں سمجھنا چاہئے کہ توہین اور فحش کلام آزادی بیاں نہیں ہے بلکہ اخلاقیات کو پیروں تلے روندنے اور فتنہ پروری پر مشتمل اقدام ہے۔