قاہرہ کے التحریراسکوائر پر حکومت کے خلاف احتجاجی مظاہرے

ہیومن رائٹس واچ نے حکومت مصر سے اس ملک کے عوام کے حقوق کی رعایت کرنے کا مطالبہ کیا ہے۔
ہمارے نمائندے کی رپورٹ کے مطابق ہیومن رائٹس واچ نے سنیچر کو ایک بیان جاری کر کے کہا ہے کہ یہ ادارہ مصر کے بین الاقوامی اتحادیوں اور اقوام متحدہ سے حکومت مصر سے اپنے عوام کے حقوق کا احترام کرنے کامطالبہ کرے گا۔مصر کے عوام نے جمعے کی شب قاہرہ کے التحریراسکوائر پر حکومت کے خلاف احتجاجی مظاہرے کئے- مصری عوام ، صدر عبدالفتاح السیسی کے خلاف نعرے لگا رہے تھے اور ان کے استعفے کا مطالبہ کر رہے تھے-حالیہ مہینوں میں بہت سے عالمی ادارے اور انسانی حقوق کی تنظیمیں ، السیسی کی حکومت کی جانب سے سماجی و سیاسی آزادی ختم کئے جانے اور انسانی حقوق کی پامالی پر خبردار کر چکی ہیں ۔السیسی نے دوہزار تیرہ میں ایک فوجی بغاوت کے ذریعے مصر کے قانونی صدر محمد مرسی کو بےدخل کر کے ایک نمائشی انتخابات کے ذریعے اقتدار پر قبضہ کر لیا تھا - السیسی اس وقت مصر کے وزیردفاع تھے - مصر کے صدر السیسی مغربی ممالک کی حمایت کے سہارے اقتدار پر قابض ہیں اور مخالفین کی سرکوبی کی پالیسی اختیار کئے ہوئے ہیں-