کشمیر میں بھارتی اقدامات نے سنگین انسانی بحران کو جنم دیا ہے

اقوام متحدہ کے سیکرٹری جنرل سے پاکستانی مندوب نےکشمیر کی صورتحال پرگفتگو کی ہے۔
اقوام متحدہ میں پاکستان کی مستقل مندوب ملیحہ لودھی نے اقوام متحدہ کے سیکرٹری جنرل انتونیو گوتریس سے ملاقات کی جس میں ہندوستان کے زیر انتظام کشمیر کی صورتحال پر بات چیت کی گئی اور ملاقات میں کشمیر میں بدتر صورتحال سے نمٹنے کے لئے اقدامات کرنے کی ضرورت پر زور دیاگیا۔
اس موقع پر ملیحہ لودھی نے کہا کہ کشمیر میں ہندوستان کے اقدامات نے سنگین انسانی بحران کو جنم دیا ہے اور وہاں کی صورتحال مسلسل بگڑتی جارہی ہے، کرفیو کے باعث وادی میں معمولات زندگی مفلوج ہیں، کشمیر میں کرفیو اور لاک ڈاؤن 37ویں دن میں داخل ہوچکا ہے۔
ملیحہ لودھی نے کہا کہ گزشتہ ماہ کشمیر میں ہندوستان کی جانب سے غیر قانونی اقدام سے پیدا ہونے والا سنگین سیاسی اور انسانیت سوز بحران بین الاقوامی امن و سلامتی کے لئے خطرہ ہے۔