بھارت کے بجٹ میں پیٹرول سمیت مختلف اشیا کی قیمتوں میں اضافہ

ہندوستان میں نئے مالی سال کا بجٹ پارلیمنٹ میں پیش ہونے کے بعد پیٹرول اور ڈیزل کی قیمتیں بڑھ گئیں
ہندوستان کی سرکاری خبررساں ایجنسی یو این آئی کے مطابق قومی بجٹ بل میں پیٹرول اور ڈیزل پر دو دو روپئے فی لیٹر ٹیکس بڑھانے کے نتیجے میں دونوں کی قیمتوں میں تقریبا ڈھائی روپئے فی لیٹر سے زیادہ کا اضافہ ہوگیا ہے۔اس رپورٹ کے مطابق ہندوستان کے قومی دارالحکومت دہلی میں پیٹرول کی قیمت میں دو روپئے پینتالیس پیسے کا اضافہ ہوا جس کے بعد پیٹرول کی قیمت بہتر روپئے چھیانوے پیسے فی لیٹر ہوگیا جو آٹھ مئی کے بعد کی سب سے اونچی شرح ہے ۔ اس رپورٹ کے مطابق ڈیزل کی قیمت بھی دو روپئے چھتیس پیسے فی لیٹر کے اضافے کے ساتھ چھیاسٹھ روپئے انہتر پیسے فی لیٹر ہوگئی۔یو این آئی کے مطابق کولکتہ میں پیٹرول دو روپئے چالیس پیسے مہنگا ہوکر پچھتر روپئے پندرہ پیسے فی لیٹر اور ڈیزل دو روپئے چھتیس پیسے مہنگا ہوکر اڑسٹھ روپئے انسٹھ پیسے فی لیٹر ہوگیا۔ اسی کے ساتھ ممبئی میں پیٹرول کی قیمت اٹھہتر روپئے ستاون پیسے اور ڈیزل کی قیمت انہتر روپئے نوے پیسے تک پہنچ گئی ۔