آیت اللہ ہاشمی شاہرودی مجمع تشخیص مصلحت نظام کے نئے سربراہ

رہبر معظم انقلاب اسلامی حضرت آیت اللہ العظمی خامنہ ای نے پانچ سالہ نئی مدت کے لئے مجمع تشخیص مصلحت نظام کے سربراہ اور ارکان کو منصوب کردیا ہے.

تقریب خبر رساں ایجنسی کے مطابق رہبر معظم نے اپنے حکم میں آیت اللہ ہاشمی شاہرودی کو مجمع تشخیص مصلحت نظام کا نیا سربراہ مقررکیا ہے۔

رہبر معظم نے اپنے اسی حکم نامے ڈاکٹر محسن رضائی کو مجمع تشخیص مصلحت نظام کا سیکریٹری برقرار رکھا ہے۔

رہبر معظم انقلاب اسلامی نے اپنے پیغام میں مجمع تشخیص مصلحت نظام کے سابق سربراہ اور سابق اراکین مرحوم آیت اللہ ہاشمی رفسنجانی، مرحوم حجۃ الاسلام واعظ طبسی، مرحوم عسکر اولادی اور مرحوم جناب ڈاکٹر حسن حبیبی کی گرانقدر خدمات پر شکریہ ادا کرتے ہوئے ان کے لئے اللہ تعالی کی بارگاہ سے رحمت اور مغفرت طلب کی۔

آپ نے مجمع تشخیص مصلحت نظام کو ملک کا اہم قانونی ستون قراردیتے ہوئے فرمایا ہے کہ مجمع تشخیص مصلحت نظام نے ملک کی کلی پالیسیاں وضع کرنے میں اہم کردار ادا کیا ہے اور امید ہے کہ آئندہ بھی مجمع کے ارکان مزید دقت کے ساتھ ملک کی پیشرفت اور ترقی کے سلسلے میں اپنا اہم کردار ادا کریں گے۔

اس حکم کے مطابق، ایرانی صدر، عدلیہ کے سربراہ، پارلیمنٹ اسپیکر، گارڈین کونسل کے مذہبی رہنما، مسلح افواج کے سربراہ اور اعلی قومی سلامتی کونسل کے سیکریٹری بھی تشخیص مصلحت نظام کونسل کے قانونی اراکین میں سے ہوں گے.

واضح رہے کہ 44 اراکین پر مشتمل تشخیص مصلحت نظام کونسل (ایکسپیڈیئنسی کونسل) ایران کے نظام کا ایک فیصلہ کن اور اہم ادارہ ہے۔

اس کونسل میں حکومت کے تینوں شعبوں کے سربراہ اور گارڈین کونسل کے مذہبی ارکان شامل ہیں. قائد اسلامی انقلاب کی جانب سے ہر پانچ سال کے لئے چیئرمین، سیکرٹری اور اراکین کا انتخاب کیا جاتا ہے.