شام کے صدر بشار اسد نے کہا ہے کہ ادلب اور حلب کی آزادی کے لئے ہونے والے آپریشن نے دہشتگردوں کی ناک زمین پر رگڑ دی ہے۔
شام کے صدر بشار اسد نے پیر کے روز دہشتگردوں کے خلاف ملکی افواج کی کامیابیوں کی مناسبت سے ٹیلی ویژن پر اپنی نشری تقریر میں ان کامیابیوں کو شام میں دہشتگردی کے مکمل خاتمے کا پیش خیمہ قرار دیا۔ انہوں نے اس بات پر زور دیا کہ ترکی کی جانب سے بلند ہونے والے شور شرابے پر کوئی توجہ دئے بغیر ادلب اور حلب میں دہشتگردوں کے خلاف فوج کا آپریشن جاری رہے گا۔
شامی فوج نے حالیہ چند ہفتوں میں ملک کے دو اہم صوبوں حلب اور ادلب میں دہشتگردوں کے خلاف بڑی کامیابیاں حاصل کی ہیں جس پر ترکی کی جانب سے خاصی ناراضگی دیکھنے میں آئی ہے۔
قابل ذکر ہے کہ شام میں سرگرم دہشتگردوں میں ایک بڑی تعداد ترکی کے حمایت یافتہ دہشتگردوں کی ہے۔
شامی فوج نے اپنے تازہ ترین آپریشن میں حلب شہر اور اسکے مضافاتی علاقوں کو کئی سال کے بعد دہشتگردوں کے چنگل سے آزاد کرایا جس پر حلب کے باشندوں نے سڑکوں پر نکل کر خوشیاں منائی ہیں۔
واضح رہے کہ شام کا بحران دوہزار گیارہ میں شروع ہوا جس کے تحت ترکی، سعودی عرب، امریکہ اور اسکے اتحادیوں کے حمایت یافتہ تکفیری دہشتگرد گروہوں نے صیہونی حکومت کے حق میں خطے کے حالات کا رخ بدلنے کے لئے شام میں سرگرمیاں شروع کیں مگر شامی حکومت ایران اور روس کی مدد سے انہیں کنٹرول کرنے میں کامیاب رہی۔