امریکی سینیٹ کی خارجہ تعلقات کمیٹی کے رکن سینیٹر رنڈ پال نے جنرل سلیمانی کے قتل کو جنگی اقدام قرار دیتے ہوئے کہا ہے کہ ٹرمپ حکومت کے اس اقدام کا مطلب واشنگٹن تہران تعلقات میں سفارتکاری کی موت ہے-
سینیٹررنڈ پال نے سی این این کے ساتھ انٹرویو میں سپاہ قدس بریگیڈ کے کمانڈر جنرل سلیمانی کے قتل پر تنقید کرتے ہوئے خبردار کیا ہے اور کہا ہے کہ اب یقینا امریکہ کے خلاف مزید انتقامی کارروائیاں ہوں گی ۔
ریاست کنٹاکی سے سینیٹ کے رکن رنڈ پال نے ٹرمپ حکومت کے اس دہشتگردانہ اقدام سے ایران کے ساتھ سفارتکاری کا موقع ضائع ہوجانے پر افسوس کا اظہار کرتے ہوئے کہا کہ میری نظر میں جنرل سلیمانی کا قتل ، سفارتکاری کی موت  ہے اور اس صورت حال سے نکلنے کا کوئی راستہ نظر نہیں آرہا ہے۔اس امریکی سینیٹر نے مزید کہا  کہ اگر ہم  ایٹمی سمجھوتے کو پھاڑ دینے ، تہران پر پابندیاں عائد کردینے اورایران کے اعلی کمانڈر کو  قتل کردینےکے بعد بھی یہ سوچیں کہ  ایرانی ہم سے کہیں گے کہ ، امریکہ تمھیں کیا چاہئے؟ تو دماغی طور پر یہ ایک دیوالیہ پن ہے-
رنڈ پال نے کہا کہ ٹرمپ کا یہ اقدام ، ایک جنگی اقدام ہے اور اس کے لئے کانگریس کی اجازت کی ضرورت تھی۔