پارلمینٹ کو معطل کرنے کے برطانوی حکومت کے اقدام اور پھر سپریم کورٹ کے ذریعے حکومتی اقدام کو غیر قانونی قرار دے دیئے جانے کے بعد سولہ روز کے وقفے سے دارالعوام کی کارروائی دوبارہ شروع ہوگئی
خبروں کے مطابق دارالعوام نے جبری طور پر معطل رہنے کے بعد سولہویں دن اپنا کام دوبارہ شروع کردیا ہے - برطانوی وزیراعظم جانسن نے ملکہ برطانیہ کی توثیق کے ذریعے پارلیمنٹ کو پانچ ہفتے کے لئے معطل کردیا تھا تاکہ وہ بریگزیٹ پر عمل درآمد کی راہ میں کوئی رکاوٹ نہ ڈال سکے لیکن برطانوی سپریم کورٹ کے فل بینچ میں شامل سبھی گیارہ ججوں نے اپنے متفقہ فیصلے میں پارلیمنٹ کو فوری طور پر بحال کرنے کا حکم جاری کیا - سپریم کورٹ نے اپنے فیصلے میں کہا ہے کہ پارلیمنٹ کو ملکہ برطانیہ کی توثیق کے ذریعے معطل کرنے کا وزیراعظم کا فیصلہ غیر قانونی ہے - اس درمیان یورپی یونین سے برطانیہ کے نکلنے کے مسئلے پر برطانیہ کی سیاسی جماعتوں کے درمیان کشیدگی شدت اختیار کرتی جا رہی ہے - حزب اختلاف کی سب سے بڑی جماعت لیبر پارٹی اور دارالعوام کے بہت سے ارکین کسی ڈیل کے بغیر یورپی یونین سے برطانیہ کی علیحدگی کے مخالف ہیں -