چین: 12 امریکی دفاعی کمپنیوں پر برآمدی پابندیاں 6 کمپنیاں ناقابل اعتبار قرار

امریکی پابندیوں کے ردعمل میں چین نے بڑا فیصلہ کرتے ہوئے 12 امریکی دفاعی کمپنیوں پر برآمدی پابندیاں عائد اور دیگر 6 کمپنیوں کو ناقابل اعتبار قرار دیا۔

امریکہ اور چین کے درمیان تجارتی محاذ آرائی میں شدت آگئی ہے اور چین نے امریکی پابندیوں کے جواب میں 18 امریکی کمپنیوں کو بلیک لسٹ کردیا ہے۔

چینی وزارت تجارت کے مطابق یہ اقدام امریکی صدر ڈونلڈ ٹرمپ کی جانب سے چینی مصنوعات پر اضافی ٹیرف عائد کرنے کے فیصلے کے بعد کیا گیا ہے۔ بیجنگ نے 12 امریکی دفاعی کمپنیوں کو اپنی کنٹرول لسٹ میں شامل کردیا ہے، جس کے تحت ان کمپنیوں کی اشیاء کی برآمد پر پابندی عائد کر دی گئی ہے۔

علاوہ ازیں 6 دیگر امریکی کمپنیوں کو ناقابل اعتماد اداروں کی فہرست میں شامل کر لیا گیا ہے، جس سے بیجنگ کو ان کے خلاف تادیبی کارروائیوں کا اختیار حاصل ہو گیا ہے۔

چینی وزارت تجارت نے اعلان کیا ہے کہ امریکی مصنوعات پر 50 فیصد نیا ٹیرف، اور پہلے سے طے شدہ 34 فیصد اضافی چارجز جمعرات سے نافذ العمل ہوں گے۔

دوسری جانب امریکی وزیر خزانہ اسکاٹ بیسنٹ نے چینی اقدامات کو مایوس کن قرار دیتے ہوئے کہا ہے کہ چین نے 84 فیصد جوابی محصولات عائد کر کے عالمی تجارتی نظام کی خلاف ورزی کی ہے۔

انہوں نے کہا کہ چین مذاکرات سے راہ فرار اختیار کررہا ہے حالانکہ وہ عالمی تجارتی نظام کی بڑی خلاف ورزی کررہا ہے۔ امریکہ اپنی پیداوار میں توازن لانا چاہتا ہے، جبکہ چین کو اپنی کھپت بڑھانے کی ضرورت ہے۔

ماہرین کا کہنا ہے کہ یہ کشیدگی آئندہ دنوں میں مزید شدت اختیار کر سکتی ہے، جس کے اثرات عالمی منڈیوں پر بھی مرتب ہوں گے۔