صہیونی فوج کے ہاتھوں غزہ کے الشفا اسپتال کے وحشیانہ محاصرے کی تفصیلات

غزہ کے الشفا اسپتال کے سربراہ محمد ابو سلمیہ نے اس اسپتال کی صورتحال کو تباہ کن قرار دیتے ہوئے کہا: "اسپتال میں موجود لوگ پیاس سے رو رہے ہیں۔"

ابو سلمیہ نے اس بات کی طرف اشارہ کرتے ہوئے کہ صیہونی فوجی ابھی تک ہسپتال پر گولیاں چلا رہے ہیں، تاکید کی: کوئی بھی ایک عمارت سے دوسری عمارت میں نہیں جا سکتا۔ ہمارا اپنے ساتھیوں سے رابطہ منقطع ہو گیا ہے۔

انہوں نے یہ بیان کرتے ہوئے کہ اسرائیلی ڈرون مسلسل ہسپتال پر پرواز کر رہے ہیں، واضح کیا: صہیونی فوجی وارڈز میں گشت کر رہے ہیں اور کچھ لاشیں اٹھا کر لے گئے ہیں۔ ہم نے ہسپتال کے صحن میں تقریباً 80 لاشیں دفن کی ہیں۔

اس فلسطینی اہلکار نے اشارہ کیا: ہسپتال میں آکسیجن مکمل طور پر ختم ہو چکی ہے۔ ہسپتال میں ہتھیاروں کی آمد سے متعلق اسرائیلی کہانیاں سراسر جھوٹ ہیں۔ اسپتال کے اندر سے اسرائیلی فورسز پر ایک بھی گولی نہیں چلائی گئی۔ 

ابو سلمیہ نے یہ بھی کہا: جنگل کا قانون بھی الشفاء ہسپتال جیسی صورت حال کی اجازت نہیں دیتا۔ اسرائیلی ٹینک ابھی تک ہسپتال کو گھیرے ہوئے ہیں۔ ہسپتال میں 650 سے زائد مریض اور پانچ ہزار بے گھر افراد موجود ہیں۔ ہسپتال کو مکمل طور پر گھیر لیا گیا ہے اور اسرائیل نے پانی کی مین پائپ لائن کو بھی تباہ کر دیا ہے۔

صیہونی حکومت کی افواج کی بڑی تعداد غیر قانونی طور پر اس میڈیکل کمپلیکس میں داخل ہوگئی اور کل اچانک الشفاء میڈیکل کمپلیکس کے نیچے مزاحمتی فورسز کی سرنگوں اور ہتھیاروں کی موجودگی کا دعویٰ کیا۔ چند گھنٹے قبل فرانسیسی خبر رساں ایجنسی نے اطلاع دی تھی کہ اسرائیلی افواج الشفا ہسپتال سے نکل گئی ہیں اور اس میڈیکل کمپلیکس کے قرب و جوار میں تعینات ہیں۔

غزہ کی وزارت صحت کے ڈائریکٹر جنرل منیر البرش نے اسرائیلی فورسز کے ہسپتال سے نکلنے کے بعد کہا: "قابضین نے الشفاء میڈیکل کمپلیکس کو تباہ کر دیا اور اس کمپلیکس میں موجود آلات کو تباہ کر دیا۔"

منیر البرش نے مزید کہا: "قابض حکومت کی فورسز نے الشفاء ہسپتال کے عملے کے دو انجینئروں کو گرفتار کر لیا ہے اور اس وقت بڑی تعداد میں اسرائیلی ٹینک الشفاء میڈیکل کمپلیکس کے سامنے کھڑے ہیں۔"

آخر میں البراش نے زور دے کر کہا: "اسرائیلی افواج کو ہسپتال میں کوئی فوجی سازوسامان یا ہتھیار نہیں ملے اور ہم بنیادی طور پر ہسپتال میں فوجی سازوسامان کی تعیناتی کی اجازت نہیں دیتے۔"