حشد الشعبی کا کامیاب آپریشن دہشتگرد گروہ داعش4 ٹھکانوں کو تباہ

عوامی رضاکار فورس حشد الشعبی نے صوبہ صلاح الدین میں دہشتگرد گروہ داعش کے خلاف کامیاب آپریشن کرتے ہوئے اس کے 4 ٹھکانوں کو تباہ کردیا ہے۔

عراق کی رضاکار فورس الحشد الشعبی کے 52 بریگیڈ کے کمانڈر احمد جاسم الآمرلی نے کہا ہے کہ الحشد الشعبی اورعراقی فوج  نے دہشتگرد گروہ داعش کے خلاف آپریشن کے دوسرے دن ایک کامیاب کارروائی کے دوران داعش کے 4 ٹھکانوں کو تباہ کردیا۔

عراق کی رضاکار فورس الحشد الشعبی اور فوج نےعراق کے شمالی صوبوں کرکوک اور صلاح الدین میں امن و امان برقرار کرنے کیلئے منگل کے روز سے ایک آپریشن شروع کیا ہے جو 10 روز تک جاری رہے گا۔

عراق کی عوامی رضاکار فورس الحشد الشعبی، اپنے ملک کی دیگر سیکورٹی فورسز کے ساتھ بھرپور تعاون کر رہی ہے اور وہ مختلف علاقوں میں جاری آپریشنز میں شامل ہے اور خاص طور سے داعشی عناصر کے خلاف وہ مکمل طور پر سرگرم عمل ہے۔

یاد رہے کہ عراق میں داعش دہشت گرد گروہ کی شکست کے اعلان کے باوجود اس تکفیری گروہ کے کچھ عناصر مختلف علاقوں میں روپوش ہیں جو موقع ملنے پر دہشت گردانہ کاروائیاں کر کے عراقی عوام میں دہشت کا ماحول پیدا کرنے کی کوشش کرتے رہتے ہیں، حالانکہ الیوم السابع کی رپورٹ کے مطابق عراقی فورسز عراق کے شہر موصل اور کرکوک میں روپوش اور باقیماندہ داعش دہشت گردوں کے خلاف کارروائی جاری رکھے ہوئے ہیں۔