بھارت کی سیز فائر کی خلاف ورزیوں کا سلسلہ جاری

بھارت کی سیز فائر کی خلاف ورزیوں کا سلسلہ جاری ہے اور لائن آف کنٹرول (ایل او سی) پر اس کی بلااشتعال فائرنگ سے 2 بزرگ شہری زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوجی اہلکاروں نے سیز فائر کی خلاف ورزی کرتے ہوئے ایل او سی کے بروہ اور خنجر سیکڑز میں شہری آبادی پر مارٹر گولوں اور خودکار ہتھیاروں سے بلااشتعال فائرنگ کی۔

بھارتی فوج کی بلااشتعال فائرنگ کے نتیجے میں ایک ہی خاندان کے 2 بزرگ افراد زخمی ہوئے، جنہیں طبی امداد کے لیے قریبی ہسپتال منتقل کیا گیا۔

بیان میں کہا گیا کہ یہ بھارتی اشتعال انگیزی سے رواں سال ہونے والے پہلے دو جانی نقصانات ہیں۔ بھارت یکم جنوری سے اب تک 38 بار سیز فائر کی خلاف ورزیاں کرچکا ہے۔

واضح رہے کہ گزشتہ کچھ عرصے میں بھارت کی جانب سے لائن آف کنٹرول پر بلااشتعال فائرنگ کے واقعات میں تواتر سے اضافہ دیکھا گیا ہے اور آئے روز آزاد کشمیر میں ایل او سی کے مختلف سیکٹرز پر بلااشتعال فائرنگ کی جاتی ہے۔