QR codeQR code

'انتہائی خطرناک' طالبان قیدیوں کو رہا نہیں کریں گے۔ افغان حکام

9 Jul 2020 گھنٹہ 14:18

ہم امن کے لیے تیار ہیں اور معاہدے کے مطابق بقیہ قیدیوں کو رہا کریں گے، بس ان قیدیوں کو نہیں جن کے خلاف عدالتوں میں سنگین فوجداری مقدمات ہیں۔ ترجمان جاوید فیصل


افغان حکام کا کہنا ہے کہ وہ امن معاہدے کی شرائط کے تحت قیدیوں کے تبادلے کے پابند ہونے کے باوجود 'انتہائی خطرناک' سمجھے جانے والے سینکڑوں طالبان قیدیوں کو رہا نہیں کریں گے۔

دریں اثنا تشدد نے جنگ زدہ ملک کو اپنی گرفت میں لے رکھا ہے جہاں خودکش بمبار نے صوبہ قندھار میں گورنر کی رہائش گاہ اور پولیس ہیڈ کوارٹر کے قریب تین سکیورٹی اہلکاروں کو ہلاک کردیا۔

رپورٹ کے مطابق امریکا اور طالبان کے درمیان ہونے والے امن معاہدے کے تحت 5 ہزار طالبان قیدیوں کو تبادلہ کرنے کا وعدہ کیا گیا تھا جس کے بدلے میں طالبان ایک ہزار افغان سیکیورٹی فورسز کے قیدیوں کو رہا کریں گے۔

تاہم قومی سلامتی کونسل (این ایس سی) کے ترجمان جاوید فیصل نے کہا کہ جن 600 طالبان قیدیوں کو رہا کرنے کا کہا گیا ہے ان کے خلاف ابھی بھی 'سنگین فوجداری مقدمات' چل رہے ہیں۔

ایک اور سرکاری عہدیدار نے نام ظاہر نہ کرنے کی شرط پر بتایا کہ ان میں قتل، ہائی وے ڈکیتی اور یہاں تک کہ بچہ بازی کے ملزمان کے ساتھ ساتھ سینکڑوں غیر ملکی جنگجو شامل ہیں۔

عہدیدار نے بتایا کہ انہیں رہا کرنا بہت خطرناک ہے۔ طالبان نے حکومت پر الزام عائد کیا کہ وہ قیدیوں کے خلاف جھوٹے فوجداری مقدمات تشکیل دے رہی ہے۔ طالبان کے ترجمان ذبیح اللہ مجاہد نے کہا کہ 'اگر وہ اس سلسلے میں مزید مسائل پیدا کرتے رہے تو پھر اس سے ظاہر ہوتا ہے کہ وہ نہیں چاہتے ہیں کہ معاملات بہتر طریقے سے حل ہوں۔

تاہم قومی سلامتی کونسل کے ترجمان جاوید فیصل نے زور دیا کہ حکومت مذاکرات کے لیے پرعزم ہے۔ انہوں نے کہا کہ ہم امن کے لیے تیار ہیں اور معاہدے کے مطابق بقیہ قیدیوں کو رہا کریں گے، بس ان قیدیوں کو نہیں جن کے خلاف عدالتوں میں سنگین فوجداری مقدمات ہیں۔

دونوں فریقین نے قیدیوں کا تبادلہ مکمل ہونے کے بعد افغانستان میں کئی دہائیوں سے جاری تنازع کو ختم کرنے کے لیے براہ راست بات چیت کرنے کے عزم کا اظہار کیا ہے۔

حکومت پہلے ہی 4 ہزار سے زائد طالبان قیدیوں کو رہا کر چکی ہے جبکہ باغیوں نے اپنی رہائی کا تقریبا دو تہائی مکمل کیا ہے۔ رواں ہفتے کے آغاز میں ایک اعلیٰ افغان عہدیدار نے کہا تھا کہ یہ حکام پر منحصر ہے کہ کس کو رہا کیا جائے۔


خبر کا کوڈ: 468702

خبر کا ایڈریس :
https://www.taghribnews.com/ur/news/468702/انتہائی-خطرناک-طالبان-قیدیوں-کو-رہا-نہیں-کریں-گے-افغان-حکام

تقريب خبررسان ايجنسی (TNA)
  https://www.taghribnews.com