امریکہ میں ایک طیارہ ہچکولے کھاتا ہوا ایک گھر پر گر کر تباہ ہوگیا ہے۔
بین الاقوامی خبر رساں ادارے کے مطابق امریکی ریاست کیلی فورنیا میں ایک چھوٹا طیارہ ایس آر-22 لاس اینجلس کے قریب ایک رہائشی عمارت پر گر کر تباہ ہوگیا جس سے گھر کا ایک حصہ مکمل طور پر منہدم ہوگیا اور آگ بھڑک اُٹھی۔
ریسکیو اداروں نے امدادی کاموں کا آغاز کرتے ہوئے طیارے کے ملبے کو ہٹالیا ہے جب کہ پائلٹ کی جلی ہوئی لاش برآمد ہوئی ہے۔
طیارہ جس گھر پر گرا تھا اس وقت باپ شیر خوار بچے کے ہمراہ موجود تھا تاہم جیسے ہی طیارہ گرا وہ تیزی سے بھاگتے ہوئے آگ لگنے سے چند سیکنڈ پہلے بچے کے ہمراہ گھر سے نکلنے میں کامیاب ہوگیا اور محفوظ رہا۔ حادثے کی وجوہات کا تعین نہیں ہوسکا ہے۔ انکوائری کمیٹی تشکیل دے دی گئی ہے۔
واضح رہے کہ امریکہ میں طیارے گرنے کے واقعات میں اضافہ ہو گیا ہے۔