ڈونلڈ ٹرمپ کے خلاف مواخذے کی پہلی عام سماعت آئندہ ہفتے ہوگی

امریکی صدر ڈونلڈ ٹرمپ کے خلاف مواخذے کی تحقیقات کے لیے ایوان نمائندگان کی کمیٹی میں پہلی عام سماعت آئندہ ہفتے ہوگی۔
امریکی ایوان نمائندگان کی انٹیلی جنس کمیٹی آئندہ ہفتے بدھ کو مواخذے کی تحقیقات کے لیے کھلی سماعت کرے گی۔ یوکرین میں امریکی سفیر ولیم ٹیلر اور نائب معاون وزیر خارجہ جارج کینٹ بیان ریکارڈ کرائیں گے۔
کمیٹی کے چیئرمین ایڈم شِف کا کہنا ہے کہ معاملے کی عام سماعت سے امریکی عوام کو ٹرمپ کے خلاف کیس پر اپنی رائے قائم کرنے کا موقع ملے گا۔
واضح رہے کہ صدر ٹرمپ پر الزام ہے کہ انہوں نے یوکرین کی مالی امداد روکی اور وہاں توانائی کے شعبے میں کام کرنے والے اپنے سیاسی حریف جو بائیڈن کے بیٹے ہنٹر بائیڈن کے خلاف تحقیقات کے لیے یوکرینی حکام پر دباؤ ڈالا۔
اس طرح انہوں نے اپنے حلف کی خلاف ورزی کی اور ذاتی فوائد کے لیے امریکی خارجہ پالیسی کا غیر قانونی استعمال کیا۔