شاہد خاقان عباسی کو گردوں اور ہرنیا کے مسائل کا سامنا

بین الاقوامی خبررساں ادارے  کے مطابق سابق وزیراعظم نواز شریف اور سابق صدر آصف زرداری کے بعد سابق وزیراعظم شاہد خاقان عباسی کو بھی جیل سے ہسپتال منتقل کر دیا گیا ہے۔
ذرائع کے مطابق شاہد خاقان عباسی کو گردوں اور ہرنیا کا مسئلہ ہے جس پر ڈاکٹروں نے ان کا آپریشن تجویز کیا ہے۔
شاہد خاقان عباسی کو اسلام آباد کے ایچ ایٹ میں واقع نجی اسپتال منتقل کیا گیا ہے جہاں ان کا ہرنیا کا آپریشن کیا جائے گا۔
یاد رہے کہ میڈیکل بورڈ نے اڈیالہ جیل میں شاہد خاقان عباسی کا معائنہ کیا تھا جس کے بعد ان کے گردے اور مثانے میں پتھری کی تشخیص ہوئی تھی۔ میڈیکل بورڈ نے شاہد خاقان عباسی کے ہرنیا کے آپریشن کی سفارش کی جس پر سابق وزیراعظم نے اپنے خرچ پر علاج کروانے کے لیے عدالت سے درخواست کی تھی۔
محکمہ داخلہ پنجاب نے سابق وزیراعظم شاہد خاقان عباسی کو اسپتال منتقل کرنے کا نوٹی فکیشن جاری کیا تھا۔