ایران کی جانب سے شمالی شام میں جھڑپوں کا سلسلہ ختم کرنے کی تاکید

ایران کی وزارت خارجہ کے ترجمان نے شمالی شام کے حالات کے سلسلے میں روس اور ترکی کے درمیان ہونے والے سمجھوتے کی جانب اشارہ کرتے ہوئے تاکید کی ہے کہ ایران ہر اس اقدام کا خیرمقدم کرتا ہے جو شام کی ارضی سالمیت اور اقتداراعلی کے تحفظ پر منتج ہو۔
روس اور ترکی کے صدور نے منگل کی شام روس کے شہر سوچی میں شمالی شام کی سیکورٹی صورت حال کے بارے میں دس شقوں پر مشتمل ایک سمجھوتے پر دستخط کئے۔ اس سمجھوتے میں شام کی ارضی سالمیت کے تحفظ پر تاکید کے ساتھ کہا گیا ہے کہ کرد ملیشیا کی تمام یونٹوں کو منبج اور تل رفعت سے باہر نکلنا ہوگا۔
ایران کی وزارت خارجہ کے ترجمان سید عباس موسوی نے بدھ کو کہا کہ ایران ، شمالی شام میں جھڑپوں کا سلسلہ ختم کرنے کے لئے روس اور ترکی کے درمیان ہونے والے سمجھوتے کو علاقے میں امن و استحکام کی بحالی کے لئے مثبت قدم سمجھتا ہے۔
سید عباس موسوی نے امید ظاہر کی کہ یہ سمجھوتہ ایک جانب ترکی کی سیکورٹی تشویش دور کرنے اور دوسری جانب شام کے قومی اقتدار اعلی اور ارضی سالمیت کے بارے میں تشویش ختم کرنے کے اسباب فراہم کرےگا۔
سید عباس موسوی نے شمالی شام میں بیرونی فوجیوں کی موجودگی کو علاقے میں قیام امن کا موجب نہیں گردانا اور تاکید کے ساتھ کہا کہ علاقے کے مسائل کا راہ حل ، علاقے کے اندر ہی ہے اور علاقے سے امریکی فوجیوں کا انخلاء امن و سیکورٹی بحال ہونے کا موجب ہوگا۔