ایران کے تیسرے اقدام ایٹمی معاہدے پر یورپی ممالک کی وعدہ خلافی کا جواب ہے

تہران کے خطیب جمعہ نے ایران کے تیسرے اقدام کو ایٹمی معاہدے کے حوالے سے یورپی ملکوں کی وعدہ خلافی کا جواب قرار دیا ہے۔
حجت الاسلام محمد جواد حاج علی اکبری نے اس ہفتے کی نماز جمعہ کے خطبوں میں یورپی ملکوں پر زور دیا کہ وہ ایٹمی معاہدے کے تحت کیے گئے وعدے پورے کریں۔تہران کے خطیب جمعہ نے کہا کہ یورپی ملکوں کی جانب سے ایٹمی معاہدے کی پابندی نہ کرنے کی صورت میں ایران ایٹمی معاہدے پر عملدرآمد کی سطح میں کمی کا سلسلہ جاری رکھے گا۔اس موقع پر نمازیوں نے نعرے لگا کر ایٹمی معاہدے پر عملدرآمد کی سطح میں کمی کے فیصلے کی حمایت کا اعلان کیا۔تہران کے خطیب جمعہ نے کہا کہ دنیا میں امریکی بالادستی کا خاتمہ ہورہا ہے اور مغربی ایشیا میں اس کی پے در پے ناکامیاں واشنگٹن کے زوال کا ثبوت ہیں۔انہوں نے کہا کہ امریکہ کی سیاسی، اقتصادی، اجتماعی اور ثقافتی طاقت ختم ہوگئی ہے اور دنیا اب مابعد امریکہ دور کی جانب رواں دواں ہے۔