آئین اور قانون کی عمل داری پر سمجھوتہ نہیں ہوگا

پاکستان کے وزیر اعظم نے کہا ہے کہ آئین اور قانون کی عمل داری پر سمجھوتہ نہیں ہوگا۔
پاکستان کے وزیراعظم عمران خان نے ایک مرتبہ پھر احتساب کے عمل میں تیزی لانے کے عزم کا اظہار کرتے ہوئے کہا ہے کہ ساری حزب اختلاف کی جماعتیں بھی اکٹھی ہو جائیں تو آئین اور قانون کی عمل داری پر سمجھوتہ نہیں ہوگا۔
عمران خان نے کہا کہ احتساب کا نہ رکنے والا عمل اپنے منطقی انجام کو پہنچے گا، اداروں کے خلاف سوچی سمجھی سازش کامیاب نہیں ہو گی۔
انہوں نے کہا کہ ملکی معیشت کے استحکام کا وقت شروع ہو چکا ہے، اب ساری توجہ ملکی اداروں میں بہتری اور اصلاحات پر ہے۔
پاکستان کے وزیراعظم کا کہنا تھا کہ پاکستان تیزی سے بحرانی کیفیت سے نکل رہا ہے اور قوم کو اچھی خبریں ملیں گی۔