دفاعی بجٹ ماہرین کی تیاری میں دباؤ برداشت نہیں کریں گے

پاکستان کے وزیرخارجہ شاہ محمود قریشی نے کہا ہے کہ اسلام آباد آئی ایم ایف کے دباؤ میں اپنے دفاعی بجٹ میں کمی نہیں کرے گا۔
شاہ محمود قریشی نے ملتان میں میڈیا سے گفتگو کرتے ہوئے کہا کہ آئندہ سال کا دفاعی بجٹ ماہرین کی رائے سے تیار کیا گیا ہے اور ہم آئی ایم ایف کے دباؤ کو قبول نہیں کریں گے۔ ان کا کہنا تھا کہ عالمی مالیاتی ادارے آئی ایم ایف کی جانب سے کسی قسم کی شرائط عائد نہیں کی گئی ہیں۔ پاکستانی وزیرخارجہ نے واضح کیا کہ دفاعی بجٹ قوم کی ضرورت ہے۔ شاہ محمود قریشی نے کہا کہ کسی بھی بین الاقوامی ادارے کو پاکستان کے داخلی معاملات میں مداخلت کا حق نہیں ہے اور پاکستانی فوج نے ملک کی اقتصادی صورتحال کے پیش نظر اپنے بجٹ میں خود ہی رضاکارانہ طور پر کمی کردی ہے۔ انہوں نے اپوزیشن کے احتجاج اور مظاہروں کے بارے میں کئے گئے ایک سوال کے جواب میں کہا کہ اگر احتجاج ہوگا تو بیرونی سرمایہ کیسے آئے گا اور یہ بچکانہ حرکت ہے۔ ان کا کہنا تھا کہ پاکستان سبھی ملکوں کے ساتھ دوستانہ اور پرامن تعلقات چاہتا ہے۔