ایران اور روس کا باہمی تعاون شام کے بہتر حالات کا ضامن ہے

روس کے وزیر دفاع نے اعلان کیا ہے کہ ایران اور روس کے درمیان فوجی تعاون اعلی سطح تک پہنچ گیا ہے اور شام کے حالات بہتر بنانے میں ایران اور روس کے باہمی فوجی تعاون کے مثبت اثرات مرتب ہوئے ہیں۔
مہر خبررساں ایجنسی نے اسپوٹنک کے حوالے سے نقل کیا ہے کہ روس کے وزیر دفاع سرگئی شویگو نے اعلان کیا ہے کہ ایران اور روس کے درمیان فوجی تعاون اعلی سطح تک پہنچ گیا ہے اور شام کے حالات بہتر بنانے میں  ایران اور روس کے باہمی فوجی تعاون کے مثبت اثرات مرتب ہوئے ہیں۔
روسی وزیر دفاع نے کہا کہ روس اور ایران مشترکہ طور پر عالمی دہشت گردی کے خلاف نبرد آزما ہیں۔ آستانہ اجلاس میں ہونے والے فیصلوں کا شام میں قیام امن کے سلسلے میں اہم کردار رہا ہے۔
روسی وزیر دفاع نے عالمی معاہدوں اور ایران و گروپ 1+ 5 کے درمیان ہونے والے مشترکہ ایٹمی معاہدے کو توڑنے کے سلسلے میں امریکہ پر تنقید کرتے ہوئے کہا کہ امریکہ عالمی معاہدوں کو کمزور کرکے عالمی سطح پر عدم استحکام پیدا کرنے کی پالیسی پر گامزن ہے۔ روسی وزیر دفاع نے کہا کہ امریکہ نے کئی عالمی معاہدوں کو نظر انداز کرکے عالمی امن کو خطرے میں ڈالدیا ہے۔