ایرانی وزارت خارجہ کے ترجمان نے انڈونیشیا میں ہوائی جہاز کے سانحہ پر انڈونیشیا کی حکومت اور عوام کے ساتھ ہمدردی کا اظہارکیا ہے۔

 اسلامی جمہوریہ ایران کے صدر حسن روحانی نے  انڈونیشیا کے صدر جوکو ویڈوڈو کے نام تعزیتی پیغام میں انڈونیشیا کے مسافربردار طیارے  کےگر کر تباہ ہونے پر افسوس کا اظہارکرتے ہوئے اس ملک کی حکومت عوام اور حادثے کا شکار ہونے والوں کے اہل خانہ کے ساتھ ہمدردی کا اظہار کرتے ہوئے تعزیت پیش کی ہے۔

ترجمان دفتر خارجہ بہرام قاسمی نے بھی انڈونیشیا کے مسافربردار طیارے  کےگر کر تباہ ہونے پر افسوس کا اظہارکرتے ہوئے اسلامی جمہوریہ ایران کی حکومت اور عوام کی جانب سے انڈونیشیا کی حکومت اور عوام بالخصوص طیارے کے حادثے میں جاں بحق ہونے والوں کے اہل خانہ کے ساتھ ہمدردی کا اظہار کیا۔

واضح رہے کہ انڈونیشیا کی نجی ایئر لائن کا طیارہ جی ٹی 610 کل بروز پیر، سمندر میں گر کر تباہ ہوگیا۔

سمندر میں گر کر تباہ ہونے والے انڈونیشیا کے نجی طیارے کے 189 افراد کے ہلاک ہوجانے کا خدشہ ظاہر کیا جارہا ہے ۔

ریسکیو اداروں کو امدادی کاموں میں مشکلات کا سامنا ہے، 6 لاشوں کو سمندر سے نکال لیا گیا ہے اور ریسکیو حکام کسی بھی مسافر کے زندہ مل جانے سے ناامید ہوگئے ہیں۔ امدادی کام تاحال جاری ہے۔

انڈونیشیئن حکام کے مطابق حادثے کی وجہ ابھی تک سامنے نہیں آ سکی ہے، طیارے کے بلیک باکسز، کاک پٹ ریکارڈر اور ڈیٹا فلائٹ ریکارڈر ملنے کا انتظار کیا جارہا ہے۔