ترکی میں منی لانڈرنگ کرنے والوں کے گرد قانون کا گھیرا تنگ ہوگیا جبکہ پولیس نے چھا پے مار کر 280 افراد کو گرفتار کرلیا ہے۔

مہر خبررساں ایجنسی نے ترک ذرائع کے حوالے سے نقل کیا ہے کہ ترکی میں منی لانڈرنگ کرنے والوں کے گرد قانون کا گھیرا تنگ ہوگیا جبکہ پولیس نے چھا پے مار کر 280 افراد کو گرفتار کرلیا ہے۔ ترک استغاثہ کی جانب سے ترکی سے غیر قانونی طور پر بیرون ملک رقوم منتقل کرنے والے 417 افراد کے وارنٹ گرفتار ی جاری کر دیئے گئے۔ ترک حکام کے مطابق اب تک 280 افراد کی گرفتاری عمل میں آئی ہے۔ ترک پولیس نے ان تمام افراد کو امریکہ میں مقیم یہودی ایرانی نژاد افراد کو غیرقانونی طریقوں سے رقم منتقل کیے جانے کے جرم میں گرفتار کیا۔ مشتبہ افراد کو دہشت گردوں کی مالی امداد اور مجرمانہ سازش میں ملوث ہونے کے الزامات کا سامنا ہے۔ تحقیقات میں یہ بات سامنے آئی کہ ان افراد نے 2017 سے اب تک 2 ارب 40 کروڑ لیرا ( 40 کروڑ ڈالر) 28 ہزار 88 غیر ملکی اکاؤنٹس میں منتقل کیے تھے۔ واضح رہے کہ ترک کرنسی لیرا کو اس وقت اپنی قدر میں کمی کے بحران کا سامنا ہے، رواں برس ترک لیرا کی امریکی ڈالر کے مقابلے میں قدر 40 فیصد کم ہوئی ہے۔