پاکستان سےزائرین کی ایران آمد کا سلسلہ بھی جاری ہے اور ایرانی بارڈر میرجاوہ میں زائرین کو ہر قسم کی سہولیات مہیا کی جا رہی ہیں
دنیا بھر سے عاشقان محمد و آل محمد کی ایران و عراق آنے کا سلسلہ جاری ہے اور ذرائع کے مطابق ات تک کئی ملین زائرین کربلا و نجف اور سامرا پہنچ گئے ہیں۔
عراق میں تعینات اسلامی جمہوریہ ایران کے سفیر ایرج مسجدی نے کہا ہے کہ رواں سال ایرانی سرحدوں سے کربلائے معلی جانے والے زائرین امام حسین (ع) کی تعداد 30 لاکھ سے تجاوز کرجائے گی۔
انہوں نے کہا کہ اعلان شدہ اعداد و شمار کے مطابق، گزشتہ سال کے مقابلے میں چہلم امام حسین کے زائرین کی تعداد میں کافی اضافہ ہوا ہے۔
گزشتہ سال میں 20 لاکھ سے زائد زائرین سید الشہداء حضرت امام حسین علیہ السلام کے چہلم میں شرکت کے لیے عراق میں داخل ہوئے تھے۔
ادھر پاکستان سےزائرین کی ایران آمد کا سلسلہ بھی جاری ہے اور ایرانی بارڈر میرجاوہ میں زائرین کو ہر قسم کی سہولیات مہیا کی جا رہی ہیں۔
سپاہ پاسداران انقلاب اسلامی کے کمانڈر علی رضا کرد نے میرجاوہ میں پاکستانی زائرین کی خدمت کے انتظامات کا جائزہ لینے کے بعد کہا کہ اربعین امام حسین علیہ السلام پر پاکستانی زائرین کی تعداد کے پیش نظر حکومت پاکستان کی جانب سے سرحد پر نامناسب و ناکافی انتظامات تھے اور اسی وجہ سے بحرانی صورتحال پیدا ہو گئی تھی لیکن ایران کی ہلال احمر کمیٹی نے خیمے نصب کرکے زائرین کو میرجاوہ سرحد پر رہائش دی ۔
واضح رہے کہ اربعین حسینی کے موقع پر دنیا بھرسے کروڑوں زائرین کربلا پہنچتے ہیں اور حضرت امام حسین (ع) اورآپ کے اصحاب با وفا کو خراج عقیدت پیش کرتے ہیں۔