شام اپنی کامیابی کے نزدیک پہنچ چکا ہے

شام کے نائب وزیر خارجہ نے اس بات پر تاکید کرتے ہوئے کہ ان کا ملک دہشتگردی کے خلاف جنگ میں مکمل کامیابی کے نزدیک پہنچ چکا ہے بعض ممالک کی جانب سے دہشتگردوں کی حمایت کئے جانے کی خبر دی ہے۔

تقریب خبر رساں ایجنسی کے مطابق شام کے نائب وزیر خارجہ فیصل مقداد نے تاکید کی ہے کہ شام کی فوج اور اسکے اتحادیوں نے دہشتگردوں کے خاف جتنی بھی کامیابیاں حاص کی ہیں وہ ہمارے فخر و سربلندی کا باعث ہے۔

انہوں نے مزید کہا کہ کامیابیوں کا سلسلہ جاری رہے گا اور کوئی چیز بھی ان کامیابیوں کا راستہ نہیں روک سکتی۔ ملک دہشتگردی کے خلاف جنگ میں مکمل کامیابی کے نزدیک پہنچ چکا ہے اور کامیابی کے علاوہ دوسرا کوئی آپشن موجود نہیں ہے۔

المقداد نے مزید کہا کہ شام اپنی اصل حالت میں باقی رہے گا اور اسکے ٹکڑے نہیں کئے جاسکتے اور یہ موضوع حتمی اور قطعی ہے۔

انہوں نے مزید کہا کہ ہم صرف شام کی وحدت کے قائل نہیں بلکہ چاہتے ہیں کہ پوری عرب امت کے درمیان وحدت اور بھائی چارے کی فضا قائم ہو۔

فیصل المقداد نے کہا کہ شام کے عوام اپنی ملک کی نابودی نہیں چاہتے بلکہ وہ دہشتگردی کے خلاف سنجیدہ اقدامات کے خواہاں ہیں بنا برایں یہ کامیابی کہ جس کے لئے ہمارے عوام اپنا خون بہا رہے ہیں یہ ضرور حاصل ہوگی۔

انہوں نے مزید کہا کہ شام کو خطرناک دشمن کا سامنا ہے اور بعض ممالک شام میں موجود دہشتگردوں کی حمایت کر رہے ہیں۔ لیکن آج دہشتگردوں کے حامی ایک دوسرے پر الزامات کی بوچھاڑ کر رہے ہیں اور دہشتگردوں کی حمایت کے سلسلے میں ایک دوسرے کے کردار کو فاش کر رہے ہیں۔

انہوں نے کہا کہ شام کی حکومت اور سرکاری میڈیا نے سات سال پہلے ہی قطر اور سعودی عرب کی جانب سے دہشتگردوں کی حمایت کئے جانے کی خبر دی تھی لیکن آج ہم دیکھ رہے ہیں کہ ان کا سرغنہ امریکہ خود ہی قطر سے تقاضہ کر رہا ہے کہ وہ دہشتگردوں کی حمایت کرنا چھوڑ دے۔