یمنی بحریہ نے الحدیدہ ساحل کے قریب دشمن کی ایک کشتی پر قبضہ کرلیا

یمنی بحریہ اور مجاہدین نے الحدیدہ کے ساحل کے نزدیک دشمن کی ایک کشتی پر قبضہ کرلیا ہے۔

تقریب خبر رساں ایجنسی کے مطابق یمنی بحریہ اور مجاہدین نے الحدیدہ کے ساحل کے نزدیک ہونے والی ایک کشتی پر قبضہ کر کے اس میں سوار عملے کو گرفتار کر لیا ہے جس کے بارے میں امکان ہے کہ وہ فرانسیسی یا امریکی فوج سے تعلق رکھتے ہیں۔

یمن کی اعلیٰ سیکیورٹی کونسل کے سربراہ محمد علی الحوثی نے بھی اس خبر کی تایید کردی ہے۔ انہوں نے اپنے ٹوئٹر اکاونٹ پر خبر کی تایید کرتے ہوئے لکھا ہے کہ یمنی بحریہ اور مجاہدین نے الحدیدہ کے ساحل کے نزدیک دشمن کی ایک کشتی پر قبضہ کرلیا ہے جس پر ہم ان کے شکر گزار ہیں۔ 

انہوں نے مزید لکھا ہے کہ سب سے اہم بات یہ ہے کہ کشتی غیر ملکی جارح دشمن سے تعلق رکھتی ہے اور ہم یمنی نیوی اور مجاہدین کی ہوشیاری اور چابک دستی اور شجاعانہ اقدام پر ان کا شکریہ ادا کرتے ہیں۔

محمد علی الحوثی نے اپنے ٹوئٹر اکاونٹ پر کشتی کا نام بھی شائع کیا ہے۔ انکے مطابق کشتی کا نام M/Y_jehol_ll ہے جسے یمنی فورسز نے اپنے قبضے میں لے لیا ہے۔

انہوں نے لکھا ہے کہ ہمارے جوانوں نے دشمن کو دوراہے پر کھڑا کردیا ہے اب دشمن یا تو ہمارے جوانوں کے میزائیلوں کا نشانہ بنیں گے یا انہیں گرفتار کر لیا جائے گا۔

ادھر فرانس کے معروف اخبار فیگارو نے بھی اس بات کی تایید کی ہے کہ اس وقت یمن کے ساحلوں پر فرانسیسی فوجیں سعودی فوج کے ہمراہ یمنی فورسز کے خلاف حملوں میں مشغول ہیں۔